政情：王國興拒續任公職 準備退休？
立法會前議員王國興喺三年前選舉失利，但以「廿三萬監察」發言人身份不時點評政事，但佢繼剛過去嘅區議會中放棄連任選擇交棒後，尋日再公布多一項公職任期快將到期，似乎要享受退休生活喎。
王國興尋日拍片，話其物業管理業監管局副主席嘅任期將於月底屆滿，而佢早喺今年年中通知政府，因為已經年過七十歲，希望任期到期後唔好再委任佢，因為好想休息吓，似乎真係要退休喇。而佢尋日就去主持物業管理業監管局屬下嘅牌照事務委員會會議，之後就完成晒所有副主席工作，睇嚟今次拍片唔單止係向市民交代去向，亦為自己作一個留念。
改善小業主投訴渠道
佢又講到自己做過業主立案法團同埋業主委員會工作，深深感受到以前無監管令小業主投訴無門，而現時附屬法例已經交畀立法會審議，如果一切順利明年初就可以實施，相信有助業界有專業發展，亦令到市民投訴有門。睇嚟佢呢份公職幫到好多市民喎。