政情：鄧家彪空降變雙失 建制新丁劣勢中上岸

鄧家彪早喺二○○七年喺離島區議會逸東邨北選區勝出，做咗三屆共十二年區議員，今屆區選交棒，由佢嘅黨友劉展鵬出選，自己就「空降」到水泉澳選區，點知黨友輸畀民主派嘅方龍飛，雙方票數相差約二千票。鄧家彪呢次「交棒變跌棒」，自己喺水泉澳選區僅以三十二票之差，輸畀沙田區政嘅盧德明，當晚佢亦有要求重新點票，但翻盤唔成功，「老巢」保唔住，新區又輸埋，呢次都算係禍不單行嘞！

補選落敗 無緣重返立法會

其實鄧家彪都算好「黑仔」，佢一二年喺立法會勞工界功能組別自動當選，由於工聯會規定勞工界只可做一屆，第二屆就要轉直選，所以佢喺一六年出戰立法會新界東，最終敗北，喺一八年嘅立法會新界東補選再次落選，無緣重返立法會，加埋今次區選落敗，就連區議員都冇得做。

賴嘉汶許有為林港坤當選

鄧家彪開新區失敗，但係有個別嘅建制派新人就成功搶灘，當中民建聯新人賴嘉汶就成功喺屯門區議會新選區欣田，以三百多票之差擊敗民主派盧偉明，為建制派喺屯門攞到一席；另一個民建聯「新丁」許有為參選觀塘區議會新選區安達，該區戰況更加激烈，分別係報稱獨立嘅李承璋同劉伯遠，以及獲民主動力支持嘅蕭浩然，最後許有為喺「四人混戰」之下，成功突圍而出。

建制派喺沙田區嘅戰果亦相當慘烈，沙田區四十一個議席之中，四十席由民主派奪得，餘下嘅一席，就由首次參選嘅民建聯林港坤當選。因為民主黨劉青同沙田區政謝潔泳喺帝怡「撞區」，泛民出現鷸蚌相爭嘅情況，令林港坤漁人得利，以約二百票之差擊敗謝潔冰。