中環出更：馮檢基區選慘敗 黃成智按金都沒收埋
多位立法會前議員打算重返區議會，當中退出民協嘅馮檢基轉戰尖沙咀西選區，喺「五人混戰」下「一挑四」失敗，僅攞到一百五十四票，係佢自一五年起，連同立法會補選同區選在內「四連敗」，而民主黨前成員黃成智就「復出」參選彩園選區，結果再次敗陣，更被沒收選舉按金。
馮檢基喺一五年區議會選舉被工聯會「小花」陳穎欣同馮嘅前黨友黃仲棋左右夾擊下，喺「老巢」深水埗麗閣選區落敗，而喺上屆立法會選舉空降新界西，喺泛民互相搶票下，馮只係攞到唔夠百分之三嘅選票，成為「雙失議員」之餘，仲要被沒收選舉按金。去年馮更不惜退出一手創立嘅民協，都要堅持參加立法會九龍西補選，但再次落敗。今屆馮轉戰尖沙咀西選區，結果慘敗收場。
黃成智二百票都冇
其實，黃成智同蘇西智喺二十幾年前已經係競爭對手，雙方喺區選交手四次，黃成智屢戰屢敗。黃喺九四年競逐連任彩園選區，但蘇前來挑戰，成功踢走黃，其後，黃喺○三年區選再戰彩園選區，意圖重奪「老巢」，而一一年繼續挑戰蘇，但兩次都失敗告終。今屆黃重整旗鼓再戰彩園選區，但都只係攞到一百七十七票，雖然蘇取得逾三千票亦冇得留低，以近一千票輸畀林子琼。
卓妮