中環出更：怕淚彈污染 陳黎惠蓮去超市買袋裝菜
修例風波爆發激烈衝突，唔少市民擔心催淚煙喺社區殘留嘅化學物質，唔單止令空氣變差，亦驚市面上啲蔬菜水果受到二噁英污染，雖然有專家教路，話只要進食前清洗吓就得，但保良局副主席陳黎惠蓮都話擔心，但好彩佢都少喺街市買餸，通常都係叫工人姐姐去超級市場買餸，應該影響唔大喎。
卓妮早前喺一個公開場合見到陳黎惠蓮，佢話喺初初爆流感時就開始去超市買餸，慢慢就習慣咗，會叫工人去超市買，啲菜一袋袋包裝好，衞生啲又安全啲。佢又提到最近空氣污染嚴重，少咗出街，但閒時都會同孫仔去公園、郊外散散步，聖誕仲計劃好同仔女、十個孫同埋工人一齊去泰國旅行喎，最近香港社會氣氛咁差，大家都好壓抑，真係要離港放鬆吓咁話。
劉燊濤：小朋友嘅食物洗乾淨啲
至於香港表廠商會常務副會長劉燊濤（Gary）就話冇驚過！自己就乜都食，樣樣嘢都要驚，咁樣樣嘢都冇得食喇，亦都唔會話特別避忌唔去邊區買，因為邊區冇催淚煙啊？不過Gary就提到，小朋友嘅食物就真係要多啲留意，買番新鮮啲嘅，例如去超市買外國入口嘅，再洗乾淨啲，確保安全先畀佢哋食。佢仲話最近小朋友都真係悶啲o架喇，放假都冇得出去玩，希望事件快啲平息。
謝偉銓：仔女搬晒出去 叫外賣多
轉個頭見到立法會建築、測量、都市規劃及園境界議員謝偉銓（Tony），問Tony有冇受影響唔敢買水果食呢？佢就話家住北角，畀催淚煙影響嘅情況相對其他區似乎好少少，加上屋企少人，得自己同太太兩口子，仔女又搬晒出去，買餸同水果都比較少，食得又唔多，反而叫外賣多啲。
卓妮