政情：管浩鳴敗選 無緣做港島區主教
香港聖公會大主教兼香港島教區主教鄺保羅將於二○二一年退休，聖公會香港島教區前晚舉行繼承主教選舉，近期協助台灣殺人案疑犯陳同佳嘅聖公會教省秘書長管浩鳴都有份競逐，不過經過兩輪投票後最終落敗。而聖約翰座堂主任牧師謝子和就當選港島區繼承主教，獲取參選聖公會大主教嘅資格，而有關選舉預計喺明年舉行。
香港島教區喺前日傍晚舉行教區議會特別會議，以選出教區繼承主教。今次角逐教區繼承主教嘅有四名候選人，包括管浩鳴、謝子和、諸聖座堂主任牧師范晋豪同牧師梁秀珊。而新一任繼承主教就由選舉團嘅二百人經兩輪投票後選出。
謝子和當選
管浩鳴近期因為協助陳同佳而曝光率大增，但最終都係落敗。而擊敗佢嘅謝子和過去曾經喺香港、台灣、美國同埋加拿大生活、升學同侍奉，來頭亦都唔小，一九九○年喺多倫多教區被按立為會吏，翌年領受牧師聖軼，二○○七年獲派立為榮譽法政牧師，一二年返港後就接任香港島教區聖約翰堂座堂主任牧師。