政情：年輕人暴亂中被捕 黃梓謙被嘲「冷氣軍師」
香港理工大學爆發衝突，至今仲有學生被困校園，令社會上好多人都關注年輕人問題。作為兒童事務委員會非官方委員黃梓謙（Gary）自爆被人笑係「冷氣軍師」，因為委員會最關心係兒童福祉、人身安全同心理健康，希望兒童喺連串社會運動中免受傷害，但點知好多未成年人不但參與社會運動，仲喺過程中被捕，所以就有人質疑佢係「冷氣軍師」，即只係匿喺冷氣房，唔知做咗啲咩囉。
Gary話，其實佢同一眾兒童事務委員會嘅委員都擔心被困理大嘅人，特別係未成年嘅小朋友，亦都有一齊去理大，希望協助呢批小朋友平安回家，當見到校園入面咁亂，好似戰場咁，都覺得好難過，但都忍住情緒去安慰啲小朋友。
盼政府釋出善意
佢又話自己感受到年輕人嘅熱情、憤怒、絕望同恐懼，希望政府唔好完全依靠警力，要釋出善意，身體力行去接觸社會各界，敢於做政治決定，甚至回應深層次矛盾。查實，如果呢個政府真係會聆聽社會各界聲音，就唔會搞成今日局面啦。