政情：27鄉獲派電鋸 林奕權：無助清障
吸取去年超強颱風「山竹」襲港經驗，鄉議局早前申請撥款買電鋸及安全裝備，畀廿七個鄉事委員會以備不事之需，而現時各區周不時突如其來出現雜物堵路，呢啲裝備算唔算係及時雨呢？
各個鄉委會快將獲發三把充電式電鏈鋸同安全設備，每條村亦有兩把充電式普通電鋸及安全設備，鄉議局更舉行咗相關嘅訓練課程學習點用工具，睇嚟準備工夫好認真。不過，大埔鄉事委員會主席林奕權就認為，呢啲工具無法應付到現時各區出現嘅堵路，因為本身只適合用去鋸樹，直言現時嘅堵路多數係雜物，自己落手落腳將雜物搬埋一邊更加快。
交通燈未修復 籲打醒精神
早前嘅吐露港公路堵塞令大埔區頓成孤島，交通嚴重受阻，但林奕權就話對佢影響不大，因為佢多數去大埔墟工作，全程留在大埔，毋須經過吐露港，但佢都大嘆揸車同路人都要打醒十二分精神，因為區內多個十字路口嘅交通燈失靈仲未維修好。