政情：方剛報完名即飛去探孫

可能因為咁，方剛已決定喺七月下旬，即現屆立會會期結束同立法會選舉提名期開始後無耐，就會飛往加拿大休息約一個星期，順道探望佢喺美國紐約嘅外孫仔，估計佢正式報完名角逐連任後就會上機。

方剛返港後會重新投入選舉工作，但唔係為自己，而係幫田少同劉健儀助選，皆因一旦佢哋兩個都輸晒，黨主席一職可能就要由佢頂上。方剛連黨副主席都已經唔係好想做，何況係黨主席呢？所以相信佢一定會瞓身助選，隨時仲落力過幫自己。