政情：梁繼昌堅持寄聖誕卡 親友特別窩心
話咁快下個月就到聖誕節，習慣用郵件寄遞嘅人，對於呢個重要節日就特別有前瞻性。會計界立法會議員梁繼昌（Kenneth）係今時今日仍堅持向海外親友寄送實體聖誕卡嘅人，所以會早作準備以免錯過郵政局嘅截郵時間。
Kenneth話，雖然電子聖誕卡真係快靚正，但佢覺得向居於海外嘅親友送實體聖誕卡，對方會特別窩心，所以佢每年都會同太太一齊自製聖誕卡，同親筆寫上祝福語句，而聖誕卡嘅圖像，年年都係佢同仔女和太太一齊影嘅全家福。
猶如相簿承載全家回憶
Kenneth話有時出埠探訪海外親友，見到對方將咁多年來收到嘅聖誕卡都妥為保存，自己再睇番就好似一本相簿，既記錄仔女成長嘅面貌，又留下自己曾經青春嘅回憶，真係感慨萬千。由於郵遞聖誕卡要遠渡重洋，所以每年嘅截郵時間，約莫係十一月底，但確實日子就交由太太去打聽咁話。