政情：泛民內會一味拉布 建制跌入會議黑洞

內會會議有多名民主派議員提出議案，實際上就係拉布。尋日嘅會議一開始就先處理喺上次會議已經傾足一個半小時、由議員楊岳橋（AY）提出嘅議案。由於建制派喺議會人數佔多，所以AY嘅議案自然冇可能通過。點知之後到AY黨友、議員陳淑莊（Tanya）提出議案，要求立法會秘書長陳維安（Kenneth）出席會議見證內會正、副主席嘅選舉過程，皆因Kenneth應協助內會討論唔同議題，又話過往唔少內會特別會議都有Kenneth嘅身影。

民主派議員為咗拉布，當然接力發言支持Tanya嘅議案啦，其中會計界議員梁繼昌就話，自修改《議事規則》後，立法會主席選舉就改由秘書長主持，所以Kenneth應該出席內會特別會議，學習主持選舉主席嘅工作。而之後又再有多名民主派議員發言，並提及現時立法會外嘅封路問題，希望Kenneth可以出席會議作解說。

民主派議員為咗拉布，當然接力發言支持Tanya嘅議案啦，其中會計界議員梁繼昌就話，自修改《議事規則》後，立法會主席選舉就改由秘書長主持，所以Kenneth應該出席內會特別會議，學習主持選舉主席嘅工作。而之後又再有多名民主派議員發言，並提及現時立法會外嘅封路問題，希望Kenneth可以出席會議作解說。

斥仲誇張過「上火星」

民主派議員輪流發言，幾乎已用晒成個會議嘅時間。建制派議員張國鈞（Horace）去到會議尾聲，終於開腔發炮批評現今內會狀況。Horace形容依家嘅內會就好似自由活動時間，係好認真地浪費議會時間，仲形容內會就如同「會議黑洞」，有時間投入，但就冇結果產出，情況就好似喺宇宙漂浮咁。佢又重提漁農界議員何俊賢早前喺立法會大會發言時有關上火星嘅言論，認為依家嘅內會仲誇張，直情係去咗太陽系之外，批評民主派濫用選舉內會主席程序，只為逼Kenneth回應與選舉唔相關嘅事項。

Horace又批評主持會議員嘅法律界議員郭榮鏗（Dennis），直斥Dennis冇能力主持會議。Dennis雖然之後都有提醒議員發言時間唔好太長，不過就無助加快議會進度，至會議結束時都仲討論緊Tanya嘅議案，睇嚟內會真係有排先選到主席喇。