中環出更：葉劉轟公民黨賣港 黃之鋒挑機被鬧走狗
美國眾議院及參議院通過《香港人權與民主法案》，待美國總統特朗普簽署後就會生效。身兼行政會議成員同立法會議員嘅葉劉淑儀（葉劉）就喺社交網站炮轟公民黨（公文袋）賣港，因為公文袋曾經發信畀美國國會領袖，促請美國國會盡快通過有關法案。而同樣多次到其他國家「唱衰香港」、被內地官媒批評為「新生代漢奸」嘅香港眾志秘書長黃之鋒就留言挑機，點知就畀網民鬧爆係「走狗」。嗱，呢啲咪叫自己攞嚟衰囉。
葉劉喺社交網站發貼文，點名鬧爆公文袋，批評佢哋要求通過有關法案制裁香港，實際就係要打擊一國兩制，係直接損害港人利益。黃之鋒尋日就喺葉劉嘅貼文「踩場」留言，話強烈支持葉劉喺本港立法會提交「美國人權民主法案」，務求制裁美國。今次唔使葉劉自己出手還擊，因為黃已經迅即被網民鬧爆喇。
網民斥賣國求榮不知所謂
有網民直斥黃之鋒「正一垃圾」，又話佢出賣香港，做美國嘅走狗，仲要覺得自己好型咁；有人就話要強烈譴責黃，批評黃「賣國求榮不知所謂」。正所謂面就人哋畀，架就自己丟，黃今次就真係羞家喇。
卓妮