中環出更：周街催淚煙 高永文反問誰用暴力先

短片所見，當時高永文身處慈雲山，有多名市民趨前話依家香港充滿催淚煙，問佢認為政府應該點樣保障人民嘅健康？高回應時就話警察係有佢嘅職務，用最低武力嚟保持社會嘅健康，但面對現在又汽油彈、又腐蝕液體、又阻住市民返工生活，呢種情況唔可以繼續，又話知道好多年輕人心裏面有一團火，跟住話：「不過，我話畀你聽，我三十年行醫學習咗一樣嘢，就算自己認為好啱嘅」，但被市民打斷。

市民斥迴避 高即黑面

該市民話唔係講暴力同汽油彈嘅問題，高即刻黑面，好嚴肅咁話「哎吔，如果你講到汽油彈同腐蝕液體對人嘅身體有幾大傷害，依家有啲執法人員喺醫院，佢哋受到二級、三級燒傷，佢哋將來面對好艱苦嘅生活，我做醫生，我就知道」，隨即有市民話高冇答到問題，高即刻勞氣咁話，「嗰啲汽油彈燒到有人危殆呀！」

有市民話高都係冇答到，佢哋係問催淚彈。高即發火，「我知道，我知道。每一樣嘢，每一件暴力都會對身體有影響，你有冇問過邊個人用暴力先？」之後，有市民話明白佢嘅立場嘞，喺離開時，高仲話其實佢有一句嘢想講o架！跟住冇咗畫面，唔知佢嗰句想講乜呢？

卓妮