政情：何啟明講攬炒 拋出黃子華「魚蛋論」

食得唔開心 寧損人不利己

何啟明尋日喺立法會發言時，提到近日唔少年輕人話要「攬炒」，話黃子華曾經喺演出時提過「魚蛋論」，即係大家用同一樣嘅價錢去買一串魚蛋，但有人比自己多兩粒魚蛋，然後唔係要求老闆畀番兩粒魚蛋，而係要求老闆畀少兩粒；仲有就係有人有甜醬但自己冇時，唔係要求老闆畀番甜醬，反而係齊齊唔好有甜醬。

佢認為黃子華嘅「魚蛋論」，係繪影繪聲去解釋「攬炒論」。唔單止話多兩粒魚蛋同甜醬，佢仲話係自己食得唔開心，人哋食得開心時，就要求對方都唔好食，「齊齊唔好食，齊齊唔開心囉」。

佢另一個解讀，就話年輕人會因和同一城市嘅人比較而產生焦慮，政府應從政策入手，建議用二次、三次分配，但認為依家政府嘅稅務寬免，係屬於比較弱嘅二次分配。