政情：葉劉籲名店大減價 為市民療傷
反修例嘅激烈衝突持續，重創本港經濟，唔少中小企都結業。雖然政府推出紓困措施，但唔少立法會議員仍然覺得力度不足，其中身兼行政會議成員嘅葉劉淑儀尋日就建議政府呼籲全港名店宣布一齊大減價，用作治療市民嘅創傷。
倡遊客再獲額外折扣
話說立法會尋日繼續審議緊稅務寬免嘅議案，葉劉質疑政府用擠牙膏方式推出紓困措施，對振興經濟有幾大作用？佢話自己最支持零售界，仲話最鍾意就係喺得閒時「巡舖」，同埋話批發及零售界嘅邵家輝應該要投票畀佢。講開又講，早排我哋收到讀者報料，影到葉劉去名店買名牌，如果政府真係響應呼籲，唔知葉劉會唔會即刻去掃貨呢？
唔止呼籲全港名店、大商場搞大減價，葉劉仲建議政府要諗啲噱頭，例如遊客嚟消費時，出示護照或內地通行證就可以減得仲多。
另外，佢提到政府部分嘅紓困措施時，講起政府大幅減低收費，例如驗車費、屋邨商場租金時，將屋邨嘅「冬菇亭」講錯成「冬瓜亭」，但佢即刻知自己讀錯，隨即糾正番係「冬菇亭」。