政情：今日你上鏡：范國威華英雄街頭切磋

熱愛漫畫嘅新民主同盟立法會議員范國威（Gary），尋日喺Facebook擺咗一張同漫畫主角華英雄雕塑嘅合照，相中Gary學華英雄擺甫士，仲留言話同華英雄切磋吓。原來尋日Gary嘅議員辦事處搞咗個香港一日遊，帶市民去海防博物館、立法會大樓及中環展城館等等，仲去埋灣仔會展附近嘅動漫海濱樂園添！不過網民就笑Gary係跟華英雄學嘢，唔係切磋，Gary都回覆話畀人識穿添！Gary接受查詢時笑認確係學嘢而唔係切磋，至於學啲乜？佢就話係華英雄「以德服人」，唔係「以武服人」嘅精神喎！