政情：政府用完即棄有前科 土地共享顧問 冇學者想做

周永新研全民退保 遭政府全棄

上屆政府曾委託周永新進行全民退休保障研究，佢最後提出不論貧富嘅「全民養老金」方案，點知當年身兼扶貧委員會主席嘅時任政務司司長林鄭月娥拒絕接受，儼如掉咗份研究落垃圾桶，周永新成為咗政府用完即棄嘅第一個苦主。而苦主陸續有嚟，政府喺一七年成立土地小組，聲稱要社會嚟個「土地大辯論」，諗吓有乜嘢增加土地供應嘅選項，但去到大辯論尾聲，政府未等土地小組呈交初步觀察報告，就率先表明力撐填海造地，仲話要搞「明日大嶼」建人工島，簡直當黃遠輝冇到。

土地辯論架空黃遠輝 被嘲假諮詢

政府話要填海，惹嚟好大嘅反對聲音，炮轟政府架空咗土地小組兼係假諮詢，之後政府先知衰，話對土地小組提交嘅最終報告全盤接受。點解咁順攤？梗係喇，報告提出嘅選項建議，包括填海一千公頃發展東大嶼都會，只係填海面積冇政府提出嘅咁大。

正所謂見過鬼都怕黑，所以當發展局局長黃偉綸喺前幾日話顧問小組會審視土地共享計劃個案，由學者、退休人士等無商業利益人士組成，亦令人質疑係咪有用。而港大經濟及工商管理學院助理講師阮穎嫻尋日喺論壇上，直情擔心無人想加入小組，驚會成為下一個苦主。

講到收地發展公屋，阮穎嫻認同需要規劃先，但認為規劃需要至少十年，形容政策「遠水不能救近火」。香港規劃師學會前會長譚小瑩就覺得收地發展公屋唔應該淨係起公屋，搬晒啲人入去，而係要做吓規劃，例如發展學校、醫院、商場同方便居民返工嘅辦公室，先至係宜居嘅社區。至於放寬按揭上限，有市民形容措施係「地產美沙酮」，阮穎嫻話年輕人要月入六至七萬先可以上車，應該好少年輕人負擔得起，所以市民係連吸「美沙酮」嘅資格都無呀！