政情：話啃唔落監獄餐 陳健民體重竟反彈
因違法佔領行動案（佔中案）被判囚十六個月嘅「佔中三子」之一陳健民，已於壁屋監獄服刑近半年，而同因佔中案被判囚八個月、月初刑滿出獄嘅立法會社福界議員邵家臻前日去探監，指陳仍食唔落獄中晚餐，但體重已回彈三公斤，同入獄時嘅體重冇分別。
每晚只吃橙雞蛋麵包
邵家臻前日喺Facebook 貼文，話朝早去監獄探過陳健民，話佢入獄後曾減磅三公斤，但依家回彈，又引述陳話監獄晚餐好難食，仍然食唔落，每晚只係食一個橙、一隻雞蛋同埋兩個麵包就算。
陳健民入獄後教囚友英文，邵家臻話陳仍然開班授徒，依家已經係第二班，每班教四至五個學生，先係會話、後係文法，仲有實習，就係要求學生同外籍囚友對話之後匯報，仲要考試，畢業之後，再開另一班。
邵家臻又話陳健民係隔咗幾重資訊阻隔，先會知道反修例嘅情況，亦特別關心「私了」，既明白「私了」嘅前因後果，又怕擦槍走火。