政情：唐唐派彈藥畀泛民做騷
特首選舉進入最後階段，民望領先嘅特首候選人梁振英（CY）被看高一線，相反涉嫌洩露行政會議機密嘅唐英年，就被外間認定「黔驢技窮」才出此下策，企圖同CY玉石俱焚外，更等於向泛民主派提供彈藥做騷，為九月立法會選舉造勢。繼民主黨被視為「唐營B隊」後，最新曝光嘅就係化身「唐營C隊」嘅工黨，要政府破例披露行會機密文件，撈取政治本錢之心昭然若揭。
十一間電子傳媒上周五合辦嘅特首辯論，唐唐突然喺無人證物證支持下兩度爆出「政府高層會議」內容，企圖抹黑對手CY。唐唐一方面喺選舉最後階段拋出「深水炸彈」絕地反擊，但另一方面就向泛民提供源源不絕嘅彈藥做騷。唐唐無的放矢後，被視為「唐營B隊」嘅白鴿黨何俊仁如拾至寶，派出該黨代理主席劉慧卿做「排頭兵」出手，要求港府就「防暴隊論」表態解釋。
公開行會紀錄為「抽水」
另一邊廂，工黨主席李卓人亦正式走出台前同「唐營B隊」大合唱，以公眾知情權凌駕保密制為由，計劃喺明日動用立法會「尚方寶劍」特權法，要求當局公開行會嘅相關機密資料，至此看來，一直隱藏嘅「唐營C隊」正式曝光。大家都知，行會討論涉及大量敏感資料，所以內容要保密，唔可以隨便公開，況且唔少前高官已講明行會無逐字會議紀錄，所以話要公開紀錄只係「抽水」居多。
博九月立會選舉大翻身
其實有心水清嘅政界中人，對再有泛民中人獻身成為「唐營N隊」行列不感意外，因為眾所周知，泛民對醜聞纏身嘅唐唐上場情有獨鍾，由佢領導嘅弱勢政府只會向泛民提供源源不絕嘅攻擊彈藥，絕對有利喺九月立法會選舉大翻身，彌補去年區議會選舉嘅失利，所以一有機會佢哋就向唐唐主動獻身。
話時話，唐唐同泛民「眉來眼去」，行徑已令傳統左派睇到眼火爆，如果唐唐繼續玩嘢畀機會泛民做騷撈取政治本錢，最終隨時會玩火自焚。