中環出更：返內地食錯嘢 錢悅肚痛標冷汗
俗語都有話辛苦搵嚟自在食，但對一班做飲食業嘅人士嚟講，就特別會注重飲食衞生，反而家常便飯比較吸引，卓妮尋日喺一個圓桌會議上見到中港食品安全交流協會副會長錢悅，佢話前幾日發生一件好痛苦嘅事喎。
咁嚴重？佢話嗰日中午喺內地公司食咗少少嘢、飲咗包飲品，之後就返落嚟香港出席晚宴，喺中途突然間成個人不停標冷汗、全身乏力，個肚非常痛，隨即叫司機車去十字藥房買咗啲特效藥，食完藥之後休息咗一陣就好轉嘞！佢仲話自己喺內地工作對飲食已經好小心，唔相熟嘅餐廳唔會去食，至於路邊嘅街檔更加唔會，今次真係老貓燒鬚。
劉松新對食物好高要求
卓妮仲見到中港食品安全交流協會主席劉松新同香港中華出入口商會會董區艷龍。劉松新話對食物好高要求，不論自己食、朋友同家人或者消費者，你我他三方面都要講求衞生同營養，自己鍾意喺屋企食，早餐就一定係喺公司食，夥計會煲粥或者蒸吓飯。問佢點解鍾意屋企食？因為自己做開飲食，所以好多食品都追求新鮮有營養，自己屋企煮就一定啱口味。
轉頭又見到香港餐務管理協會會長楊位醒，佢就話對食品味道要求好高，不過大部分餐廳煮出嚟啲餸菜都有番咁上下，有時啲餸菜爭啲味道，佢就會用枱上嘅鹽或者叫廚房攞啲蒸魚豉油出嚟後期加工，但佢都係鍾意喺屋企食多啲。咁邊個煮飯先？佢話如果家常便飯嘅話，兩公婆會分工，通常佢就理論加埋配搭，老婆就實戰經驗豐富，其實炒碟菜煎隻蛋已經好好食，佢仲話喺屋企煮飯其實係一種好有樂趣好開心嘅事。
卓妮