政情：八網難逃：遊布吉擦餐勁 吳永嘉回味無窮
泰國一向都係唔少港人嘅熱門旅遊度假勝地，立法會議員吳永嘉（Jimmy）早前就請佢公司嘅同事去布吉玩，喺短短四日三夜嘅旅程入面，佢唔單止玩水上活動，最緊要當然係「擦餐勁」，大歎泰國菜，令佢回味無窮添！
Jimmy話以前都去過泰國好多次，布吉就係第一次去，喺芭東海灘睇日落、玩水上電單車、浮潛、實彈射擊等活動之外，仲去咗島內數一數二嘅餐廳食特色泰國菜，佢話雖然呢間餐廳比較高級同貴，但人均消費都只係三百至四百蚊港幣左右，所以絕對係食得過。
最愛泰式蒸餃
見佢喺社交平台上載多張美食相，包括有對腸胃相當有益嘅海葡萄伴老虎蝦、鹽燒豬腩肉、辣椒啫喱炒軟殼蟹、冬蔭功蝦湯，當中最特別嘅一道菜非泰式蒸餃莫屬，呢隻餃子嘅皮用咗玫瑰花染色，所以塊皮係紫色嘅，而餃子入面嘅餡就係蟹肉、免治豬肉同花生醬，佢話最多都係食兩隻餃子，唔係嘅話會「好漏」喎。
Jimmy形容呢次旅程「好正」、好好玩，唔知下次佢又會請同事去邊旅行呢？