政情：捉鬼變篤灰 姚松炎耍冧都唔掂
因宣誓風波而被取消立法會議員資格（DQ）嘅立法會建築界前議員姚松炎（Edward），近四個月以嚟多次喺網上發文話要搵「臥底」捉鬼，點知被網民鬧爆佢係捉鬼變篤灰，最終頂唔順網民狂鬧嘅壓力，尋日喺Facebook貼文道歉，點知網民都係唔收貨，仲話「極思疑你係鬼！」
網民鬧爆 反指係臥底
話時話，Edward每次一出捉「臥底」嘅post，就有網民即時留言鬧爆，甚至要佢收番言論，而佢一開始都冇諗住理，點知就愈嚟愈多人一齊鬧。班網民睇完佢嘅道歉都繼續鬧爆：「道歉有咩用」、「咁你仲唔delete個post？」「極思疑你係鬼！」等等，又笑佢調查臥底咁勁，咪又係上網睇幾張圖就算，唔通係相片傳心師，睇吓相就知係唔係鬼?
眼見死撐都冇用，Edward尋日就喺Facebook貼文，向網民耍晒冧，話因為捉「臥底」搞到同網民係呢個問題上不斷出現分歧，所以即時收番懷疑臥底嘅言論，亦都會停止所有有關臥底嘅訊息，希望大家可以接受咁話喎。佢又強調同黨派無關，重申佢嘅言論同立場只代表個人。
老實講，依家示威遊行已經夠亂，Edward仲搞埋呢啲咁嘅嘢，真係好做唔做，係咪嫌唔夠亂呀！