政情：職安好重要 蒙德揚搵鞋畀同事
千里之行始於足下，原來工業安全同腳都好有關係，職業安全健康局（職安局）成員蒙德揚（David）就深明呢個道理，事關蒙生有跑開步，仲係跑全馬添！對跑手嚟講鞋就真係好重要喇，但係原來對工業安全都一樣重要。
夥計受傷 損失更大
蒙德揚話大眾對鞋有誤解，以為軟嘅輕嘅就係好嘅，但其實呢啲鞋通常承托力唔夠、保護性不足，對於長期站立嘅工種，佢就建議着軍鞋，雖然重但就硬淨。佢又提到話自己長期練跑，買波鞋都會唔要原本附送嘅鞋墊，自己再訂造一對好啲嘅，一年換一次咁，真係唔慳得咁話喎。
至於公司啲員工，對鞋墊會唔會有乜嘢要求？佢話會特別供應適合嘅鞋畀物流部同事，雖然開支係大咗，但夥計受傷嘅話，損失就更加大喇！仲話公司真係唔好諗縮數，員工嘅安全好重要o架！