政情：娥姐又集郵 落力過追星
同楊岳橋合照上演經典一幕「鵝頸橋之戀」嘅女主角陳玉娥（娥姐），喺上年同上水鄉事委員會主席侯志強嚟咗張「背後的女人」，呢啲相真係令人難忘，而佢尋日又喺一個論壇上出現喎。
吼實嘉賓去廁所 捉住合照
話說娥姐喺活動會場坐定定，喺嘉賓進場時，佢就一個箭步上前同目標人物握手，但似乎未夠喉嘅佢，趁嘉賓去洗手間嘅時候，即刻跟實離開會場，攞定部電話企定定喺門外等對方返嚟，對方一出現就拿拿臨捉住對方合照。原來佢係想集郵。
雖然個嘉賓講咗句「快啲，唔好嘥時間」，但娥姐一於少理，影多幾張先放人走，真係追星都未必有佢咁落力，唔知佢係咪期待緊下一張驚世合照呢？