政情：女長毛嚇窒德成局長
尋日係佛誕，信佛信咗四十年、有「女長毛」之稱嘅雷玉蓮去咗由香港佛教聯合會主辦嘅浴佛大典。不過女長毛今次現身，並唔係參加浴佛大典咁簡單。原來民政事務局局長曾德成等嘉賓應邀請出席，女長毛趁呢個機會着住件DIY印有內地著名維權藝術家艾未未肖像嘅短袖衫出席，誓要嚇窒德成局長。
女長毛尋日着件白色艾未未Tee恤入場。為咗畀出席活動嘅主要嘉賓見到件衫，佢特登揀咗個近嘉賓進場嘅走廊位坐低，儀式期間其他信眾雙手合十時佢就攤開雙手。不過班官員都好似唔係好睇到佢，直到儀式完咗，嘉賓們離場時經過女長毛前，女長毛彈起身企定定喺佢哋面前，大家面對面唔夠一呎，曾德成等當堂愕晒然畀女長毛嚇窒。不過話晒都係浴佛大典，女長毛無好似平時咁盡情衝擊，不過佢就話︰「嗰時我諗，你哋都有今日喇。」
其實女長毛做咁多嘢，都係因為尋日係艾未未刑事拘留期限屆滿嘅日子。女長毛話希望內地盡快釋放艾未未同其他維權人士。