中環出更：張建宗落區「與民對話」快閃 四眼男遮鏡頭阻採訪
一場反修例風波令到香港嚴重撕裂，民與民鬥嘅情況不時發生。行政長官林鄭月娥上星期先講，為咗令社會向前，會同所有司局長由呢個月開始，落區去接觸唔同嘅人士。
尋日係風波踏入第一百日，記者就趁呢個「特別日子」去九龍灣國際展貿中心採訪出席活動嘅政務司司長張建宗，睇吓政府係咪有一番新作為，點知張建宗完全無理記者嘅提問，身邊啲「橙衫四眼男」仲伸手遮記者鏡頭，完全係干預新聞自由。
得戚問咩事
擾攘期間，張建宗梗係已經急急腳鬆人。記者問番「橙衫四眼男」點解要伸手遮鏡頭，點知佢唔單止無悔意，仲一臉得戚咁問︰「咩事？」其他橙衫男即刻拉佢入會場，搞到記者冇得再問佢個名，想投訴都唔得，淨係知個活動係由機電工程署主持。不過，最厲害係政府新聞處，出一篇新聞稿講番個活動有幾咁巴閉，但阻擋記者採訪就隻字不提，咁嘅手法對待大眾同傳媒，莫講話社會向前，真係想唔褪後都幾難呀！
卓妮