政情：腦退化症支援不足 高錕妻想政府幫口
香港人愈嚟愈長壽，但當中有部分長者患上退化症，「光纖之父」高錕生前患有腦退化症，一開始會唔記得嘢，後尾行為會慢慢好似小朋友咁容易急躁，通過太太陪佢畫畫，病情得到改善。
游說地產商起醫療中心
其太太高黃美芸尋日出席「念·高錕」活動時，就話政府冇乜留意腦退化症，都係到最近兩至三年先開始關注。佢話香港有少數協會提供照顧腦退化症患者嘅服務，希望政府可以幫手說服地產商，多啲喺大廈底層加設公共醫療中心，令多啲人得到幫助。
當問到佢點睇最近年輕人上街遊行？佢就笑住話當年高錕喺中大做校長嘅時候都試過被學生搶咪，依家嘅情況好相似，學生嘅諗法咁多年都冇變過，都係搞啲令社會接受唔到嘅「大件事」，但係學生都係一直處於學習階段，所以啱唔啱其實好難講！