政情：袁嘉蔚晒學生照 被指偷圖
曾任香港眾志副主席，但已退出眾志的袁嘉蔚（Tiffany）一直參與地區工作，日前佢喺社交網站上載一張疑似學生照，唔通佢要宣布回歸校園？唔少網友都留言，有人話佢係「可愛教主」，亦有人問佢係咪小學畢業，仲有人搞笑地問Tiffany做乜偷人圖添。
Tiffany就話，當近日大家都喺中學文憑試（DSE）放榜之際，話「要注意啲乜乜乜」，「幾多分要點點點」嘅時候，就會發覺自己老咗，仲話自己當年係考A-level、即高級程度會考嘅，所以搞到佢只能夠「徬徨地站在一旁」，就算要幫人，都唔知道應該如何入手，直言收到其他人透過短訊詢問分數去向時，「真係企咗喺度」咁話。
下年研究DSE懶人包
不過，Tiffany咁講亦唔係畀藉口自己o架，事關佢已經應承咗下年會好好研究DSE「懶人包」，希望到時幫得幾多得幾多喎。