政情：八網難逃：葉劉高禮澤 同鄉三分親

大談體壇發展

葉劉日前喺社交網站貼文，話喺乒乓球賽重遇被譽為香港「乒乓孖寶」之一嘅高禮澤，原來佢哋祖籍同屬廣東佛山南海，係早已相識嘅同鄉嚟。既然咁難得遇到，少不免閒話家常喇，仲傾到香港體壇發展，葉劉大讚香港乒乓球混雙組合黃鎮廷同杜凱琹，近日喺韓國釜山舉行嘅國際乒聯世界巡迴賽中勇奪金牌，喺國際賽事取得佳績實在值得表揚。

讚完之後，葉劉就追問高禮澤，呢批球員係咪土生土長嘅香港人，佢哋係喺內地抑或本港受訓呢？高禮澤就話，近年乒乓球員絕大部分喺沙田嘅香港體育學院接受培訓嘅。葉劉就話政府投放喺本地體育培訓嘅資源唔少，直接撥款過億元畀運動員，包括生活津貼，令運動員嘅生活得到基本保障，認為投入相關經費非常值得，一眾運動員可專注練習，喺運動場上創造佳績咁話。