政情：今日你上鏡：術後首開會陳淑莊撐拐杖現身
立法會議員陳淑莊（Tanya）早前接受腦手術切除腫瘤，休養咗一段時間，尋日係佢做腦部手術後首次出席立法會會議。Tanya着住黑色背心裙，撐着拐杖現身，佢兩名黨友、立法會議員郭家麒同楊岳橋都有陪伴在側，喺佢入會議廳時一直扶住佢，其他民主派議員見佢出現，都有擁抱問候。而Tanya尋日仲有喺議員質詢環節時發言，唔少在席嘅民主派議員都有拍枱以表支持。
有限度復工 唔可以動氣
Tanya其後喺社交網站話，現階段只能有限度復工，仲要睇吓身體反應，會謹記唔可以動氣。而佢將會繼續約見醫生，並安排接受電療，估計最快七月開始。佢又話，會盡力兼顧電療同議會工作，聽落佢嘅復原情況似乎唔錯。
Tanya係違法佔領行動案被告之一，案件四月判刑時，佢透過律師表示左腦有一個直徑四點二厘米，體積大如一個乒乓球嘅腫瘤，需要進行手術，上月切除腫瘤後住院一個星期，之後就一直休養喇。