中環出更：馬仁威搞親子行山 推廣美麗香江
由城中一班熱愛超級跑車愛好者組成嘅「M超跑會」早前喺陽明山莊舉行遠足活動，當日有幾十人參與。「M超跑會」會長馬仁威（Kelvin）話呢次係要搞搞新意思。
Kelvin話有見於每次搞活動都係揸車冇新意，而近半年社會氣氛唔係咁好，朋友唔敢嚟香港玩，諗吓諗吓就不如搞多啲多元化嘅體育活動，以推廣美麗嘅香港為題，等大家可以帶埋小朋友嚟，順便享受親子樂，一邊行山，一邊欣賞靚嘅風景，目標係變成一個高雅嘅體育會。
雖然當日只係行普通嘅行山徑，有份參與活動嘅張庭瑜、歐天賜、鄭英昌同朱文彥，後三者竟然帶齊三十米長嘅安全繩、急救包同衞星對講機等裝備。點解會帶呢啲嘢喺身？原來佢哋之前嗰晚喺大嶼山練習，積極備戰嚟緊嘅三級山藝領袖考試。
佢哋都話呢個考試對日後組織行山活動有幫助，如果成功考取資格後，每人每次能夠帶領八人行山團。至於考試模式就係要喺三日兩夜行三十公里嘅路，由於要帶備足夠嘅食水、急救包、安全繩、帳幕同替換嘅衣服。可想而知佢哋要孭好多嘢帶上山，體能要求好高，亦都係呢次考試入面最辛苦嘅事。
黃祖恆學精 避帶大相機
同場仲見到資深會員黃祖恆（Kenny）、吳均偉、張保威、蔡敬庭、兩位榮譽會董陳耀璋同方和。Kenny話好鍾意影相所以先去行山，又會去外地參加行山活動，當中最難忘係去不丹嘅經歷，Kenny話嗰次帶齊「一機兩鏡」到當地好出名嘅景點、海拔三千五百米高嘅虎穴寺觀光，因為唔係行吓山徑嘅關係，加上啲路好斜，搞到佢行上山時好吃力，亦都令佢「學精咗」，就係唔會再帶大機去行山，淨係帶細機去。
卓妮