政情：莫錦貴升呢副主席 開會打扮不變
沙田鄉事委員會主席莫錦貴月初當選新界鄉議局副主席，前日首次以副主席身份參加鄉議局執委會，不過佢就有別於其餘兩位正副主席，以及前副主席張學明，冇着西裝開會，打扮依然同往日一樣。
落村擒高擒低 若着西裝好辛苦
莫錦貴就話要得到他人尊重唔係靠衣裝，而係自己本身，加上呢身打扮都見得人咁話。佢又講到，做咗副主席後都仍然要落鄉落村，自己多年嚟都習慣一早落村，過程少不免要擒高擒低，如果着西裝搞到成身汗好辛苦，直言做咗副主席唔代表唔使做。
以往坐台下嘅長枱時嘅佢，開會就長期望住對面位，而依家上台開會就見到好多人，佢笑住話見到人多都有啲驚，但開會感覺都係一樣嘅。而為咗準備首次會議，佢話早早睇晒文件，至於會上發言就要睇時機，留番畀主席講咁話。