政情：豬皮可製皮革 鄧祐才話唔划算

鄧祐才話，豬皮向來都係皮革工業嘅原料之一，過去曾廣泛應用於服裝同製鞋業。然而豬皮毛孔較大，無論質感同外觀都較粗糙，而且又不及牛皮咁高檔，所以豬皮多數用於鞋款內裡，鞋面則使用牛皮。

現今消費觀為求價廉新款

鄧祐才又話，無論豬皮或牛皮，其實都面對新物料嘅挑戰，譬如目前市場上嘅高級仿皮革不但像真度極高，柔韌質感亦大有改進。而現時消費觀念亦由過去要求高貴、耐用，轉變為追求價廉同新款，導致鞋履生產傾向選用成本較低、但不及真皮耐用嘅仿皮革，從而減少對牛皮嘅採購，等而下之嘅豬皮就更乏需求，自然亦唔會有人向病豬嘅皮打主意喇。