政情：冼為堅童年歷戰火 嘆讀書機會勿錯過
香港恒生大學去年升格為大學，日前首次頒授榮譽院士予四位社會人士，曾出任恒生銀行獨立非執董嘅冼為堅就係其中一人。冼當日就話，自己童年係喺戰火之中度過嘅，課堂教育只係去到小學程度，所以佢就好重視年輕人嘅讀書機會喇。
冼為堅獲頒授榮譽院士，佢個仔冼雅恩都有到場支持。冼為堅一直都有支持高等院校，不過佢就傾向比較冷門嘅文史哲科目。冼為堅解釋，佢特別支持文科，係因為民間嘅教育捐贈多數都係着眼於工程同醫學等理科項目，文科就往往被忽略，所以佢就「燒冷灶」 ，為高等院校嘅文科發展略盡綿力咁話。
慨嘆學生文筆不及舊時
冼為堅又話，自己嘅童年係於戰火中度過，因此佢好重視年輕人嘅讀書機會。而佢自己得閒時都會閱讀。偏愛古籍嘅佢就發現，雖然依家教育普及程度遠高於過去，但學生嘅文筆就唔及舊時喇。咁佢個仔冼雅恩又係咪都鍾意文科呢？冼雅恩話，去澳洲升學時曾經諗過讀醫科，不過後來念及家族生意，就決定花五年時間完成會計同法律兩個學位課程喎。