政情：陳浩濂出席辯論比賽 最深刻「中學生不應談戀愛」
對於財經事務及庫務局副局長陳浩濂（Joseph）嚟講，究竟係稅務問題複雜啲，定係談戀愛問題複雜啲呢？話說Joseph出席咗由香港稅務學會搞嘅一個全港大專生辯論比賽，作為嘉賓嘅佢就諗番起自己中學參加辯論比賽嘅點滴，仲話喺唔同辯題中，佢印象最深刻嘅係「中學生不應談戀愛」呢個題目喎。
不忘推銷稅務理財
Joseph就話，其實佢都唔知道現今呢個年代仲有冇「中學生不應談戀愛」呢一類辯題，但就認為辯論係一種好好嘅訓練，由比賽前嘅資料搜集、組織論點，到比賽當日嘅說話技巧、臨場反應，以及整個過程當中嘅團隊合作都係十分重要，係寶貴嘅經驗，將會畢生受用。
不過人哋今次搞嘅係稅務辯論比賽，Joseph發言時都冇離題，佢話稅務係一個重要課題，因為任何稅務措施都可以對經濟及民生造成重大影響。而稅務措施仲可以用作達致唔同政策目的，例如以稅務誘因去鼓勵市民購買延期年金，或者作出強積金自願性供款作為退休理財。Joseph真係出席辯論比賽，都不忘推銷政府新措施噃。