中環出更：iBond重推 容海恩心郁投資保本
香港經濟低迷，政府重推通脹掛鈎債券（iBond），早前已開始接受認購。受新冠肺炎疫情影響，香港連續數月出現通縮，而新一批iBond就保證有兩厘利率喎，唔知吸唔吸引到市民認購呢？
議員容海恩（Eunice）就話打算抽幾手當作保險投資喇。Eunice話最近經濟麻麻，好多專家都叫大家分散投資，不過銀行利息太低，反而iBond保本之餘又可以應付到通脹，所以打算試吓擺部分資金落去喇。之不過，Eunice話睇到專家估計，每人到最後都係認購到兩至三手啫。另外，佢預料有市民擔心經濟動盪，而選擇認購iBond，呼籲市民量入而出、安全至上咁話喎。
陳健波籲衡量財務狀況
既然係低風險嘅投資，自然有人覺得回報低，而保險界議員陳健波（波哥）就話唔會考慮認購iBond喇。佢話投資就好睇自己可接受嘅風險程度，同埋對投資工具嘅認識。波哥話個人而言，佢認為自己嘅資產分配可以承受一定風險，加上佢認為傳統經濟股會慢慢恢復，所以唔考慮較低回報嘅iBond，反而會投資風險高少少嘅股票喎。不過，佢話投資都要睇番個人習慣，呼籲市民都要衡量番自身嘅財務狀況。佢又話如果市民係想保本嘅話，而iBond利息高過銀行係好啲嘅。
雖然iBond嘅認購期去到今日下晝就截止，但有人仲未諗定買唔買喎。金紫荊女企業家協會常務副主席鄭美恩（Lisa）話目前環球經濟唔明朗，雖然iBond屬於低風險投資，然而自我衡量資產配置之後，現階段都係以投資商品方面為主。不過，佢話喺現今嘅大環境之下，金融項目變化好大，所以呼籲市民作出任何投資之前，務必研究清楚先至下決定。
卓妮