政情：同老婆雨中睇長恨歌 網友話陳家強似唐明皇
喺香港睇歌舞劇，大多喺室內演出，喺戶外仲要係實景演出嘅歌舞劇少之又少。離開咗「熱廚房」嘅財經事務及庫務局前局長陳家強近日同老婆去咗西安華清宮睇實景歌舞劇《長恨歌》，仲係冒雨睇添，睇佢兩公婆着住雨褸影嗰張相笑晒口，就知道佢哋幾咁樂在其中喇！
陳家強日前喺Facebook上載咗幾張相，仲貼文話冒雨睇《長恨歌》，呢個歌舞劇係講述唐明皇同楊貴妃嘅故事，有網友就留言話：「你個樣都幾似唐明皇。」唔知陳家強喺現場睇歌舞劇嘅時候有冇同感？會唔會代入咗唐明皇嘅角色度呢？另有網友亦讚呢套歌舞劇有文化又浪漫。
仲遊覽咗乾陵
唔單止睇長恨歌，佢哋仲喺雨中遊覽咗唐中宗同武則天同葬嘅乾陵，又參觀咗一九三六年西安事件時蔣介石喺華清池嘅住處之後，就踏上絲綢之路，飛去敦煌，仲去咗鳴沙山，體驗大漠風情。