新城勁爆頒獎禮︰謝安琪頒獎張繼聰扮cool

「張氏伉儷」張繼聰和謝安琪（Kay）今年齊齊出席頒獎禮，新城亦把握兩公婆同台機會，刻意安排當張繼聰獲「新城勁爆創作歌手金獎」時，由Kay負責頒獎，因台上還有王梓軒、姜麗文、馮允謙多位得獎歌手，阿聰已刻意企到最側才從老婆手上匆匆接過獎，司儀啤梨不知已頒了獎，於是再叫兩人「Encore」頒多次，Kay和阿聰只得來個握手對望再頒獎，Kay仍保持笑容滿臉，反而阿聰一臉cool爆，啤梨還叫兩人「錫錫」，阿聰即時擰晒頭做口形嗌「唔好」，啤梨惟有打圓場說：「咁你哋返屋企先啦。」之後攞年度女歌手獎時，Kay換上黑色透視裙突顯豐滿上圍。