政情：EQ指對輪椅婆婆不敬 肥尹警告發律師信
香港各界青少年活動委員會早前製作咗一段國歌宣傳短片，片中有一名坐輪椅嘅婆婆聽到國歌後肅立，惹起社會爭議。立法會議員葛珮帆（EQ）尋日喺立法會《國歌條例草案》委員會上點名批評郭家麒、尹兆堅（肥尹）及張超雄三名民主派議員，質疑佢哋出言諷刺侮辱，搞到婆婆唔開心，仲激到病咗，要求佢哋道歉。不過肥尹就不滿EQ斷章取義，仲警告話會發律師信添。
斥對方斷章取義
肥尹同郭家麒喺早前嘅《國歌條例草案》委員會發言提及有關短片時，曾指短片中坐輪椅嘅婆婆「如神打上身」、有如「神迹」，事後有抗日老兵不滿佢哋言論，到立法會抗議。而尋日亦唔止EQ質疑有關言論係侮辱該名婆婆，議員蔣麗芸亦都批評早前民主派有關言論係低級趣味。
不過肥尹就話，佢並冇講過對該婆婆不敬嘅說話，話當日會上發言係為咗證明條例嘅虛妄，而佢亦都有親人係抗日戰士，批評EQ斷章取義、歪曲事實，仲叫EQ停止誹謗，否則會發律師信喎。