政情：考察被指「搞港獨」 葛珮帆鬧《蘋果》屈得就屈
好多時立法會議員唔止跟團考察，有部分議員仲會好有心咁，自費出外考察。立法會議員葛珮帆（EQ）舊年就曾經自費去咗以色列考察當地嘅海水化淡廠，其後仲有發表過感受添！EQ尋日喺立法會上就鬧爆《蘋果日報》公器私用，話佢哋喺報道佢篇感想時，質疑佢搞「港獨」。
EQ提到去完以色列考察後就喺社交網站發表感言，《蘋果日報》當時都有報道過，當中提到EQ話「期望政府能把好關，讓香港有穩妥的供水，市民未來不用捱貴水」呢句，質疑佢想話將內地東江水輸港係無良奸商。EQ就批評《蘋果日報》嘅報道上綱上線、屈得就屈，仲話《蘋果日報》只為老闆嘅政治立場服務、公器私用，愚弄民眾，只會「揸住一句說話誣衊人」。
批范國威唔識睇其他報紙
另外，EQ仲提到兩年前亦有跟立法會嘅團去考察東江水，其後亦都有喺本報發表過意見，認為政府應該要開拓本地水資源，仲建議應該要發展海綿城市同埋再生水添！佢仲提到新民主同盟范國威（Gary）喺發言時亦有講過東江水成本太貴，批評Gary只係識睇《蘋果日報》，唔會睇其他報紙。