政情：15億新空管系統天殘地缺 帳委會追殺民航處
民航處管理問題一籮籮，前特首曾蔭權爵士任內構思及獲批逾十五億元嘅新空管系統啟用兩年多醜聞不絕，經常「冧檔」或出現飛機消失，影響香港嘅航空安全。事實上，審計署早喺一四年就發表報告揭示個系統千瘡百孔，立法會政府帳目委員會尋日公布，跟進事宜仲未完，委員會繼續監察緊空管系統問題，明言有需要時或會有進一步行動！
梁繼昌曾去信杜拜了解情況
帳委會係負責研究審計報告，有需要時展開聆訊，要求政府交代如何跟進。至於要點跟進？帳委會以往都會閉門商討，尋日卻首次公布三十個仍然跟進緊嘅項目，帳委會主席石禮謙明言希望將工作放在陽光下，令公眾知悉帳委會唔係齋做聆訊同寫報告就了事，係長期監察政府有無善用公帑。
三十個項目中，就包括政府耗資十五億元購入嘅美國雷神公司新空管系統Autotrac3；聯合國難民事務高級難民署拖足三十年、仲未支付當年越南難民在港期間涉款逾十一億元開支、香港郵政嘅運作、為長者提供嘅長期護理服務、就樓宇滲水問題採取嘅聯合行動同啟德郵輪碼頭等。
由一四年開始跟進新空管系統嘅帳委會副主席梁繼昌（Kenneth）好慨嘆話，當年撰寫報告時曾召開六次公開聆訊，創下帳委會紀錄，又親自去信使用同款空管系統的杜拜當局，了解運作情況，形容花咗好多工夫去處理。
Kenneth認為空管系統對香港可以有好大影響，要檢視系統嘅穩定性必須長期觀察，包括遇上特別天氣情況下的表現，佢下個月將會到杜拜公務外訪，相信屆時亦實地視察。石禮謙笑言，帳委會逢大時大節都會追問民航處空管使用情況係點樣，明言如果無問題就唔使跟進喇！
4個月內12次系統磨合故障
翻查紀錄，新空管系統啟用初時，試過喺短短四個月內發生十二次主系統同子系統磨合故障，以及飛行間距不足及輕微技術事故大幅上升，令市民感到憂慮。審計署多次踢爆政府做羊牯，枉花公帑「入錯貨」，現任民航處處長李天柱都係乖乖哋如實交代，否則立法會勢必追殺到底！