政情：馮敬恩棄台赴英進修 否認再介入政治
港大學生會前會長馮敬恩因圍堵香港大學校務委員會事件被判二百四十小時服務令，當年佢曾經講過話會去台灣進修，原來佢上月已經去咗英國修讀碩士課程，仲開設網上平台寫下倫敦生活嘅點滴，又話有朋友同長輩問佢點解重新開始寫文章，係咪仲想介入政治？佢嘅答案係No。
馮敬恩發表最新嗰篇文章係講佢睇咗場英超賽事，跟住有網友就問佢係咪想做旅遊KOL，佢即刻閘住，話只係分享啫！有啲網友仲留言話「睇波要守法」、「最緊要守法」，而佢就回應話「宣揚守法意識！」都唔知佢係自嘲抑或特登攞番圍堵校園事件嚟玩。
想遠離紛爭而遠走
點解佢棄台赴英進修？佢喺首篇文章提及喺官司結束後，求職信石沉大海，幸好有大學老師搵佢做助理，而呢位老師建議佢嘗試報讀英國嘅大學，咁啱有幾位前輩亦話，如果佢想遠離紛爭，最好去遠啲地方，而台大都係太近香港，多少都會捲入唔同嘅政治紛爭之中，而佢亦好認同，於是到臺大申請休學。由於佢想修讀啲同中國相關嘅課程，最終選擇咗倫敦大學亞非學院修讀碩士（MSc），即係Development Studies with Special Reference to Central Asia。
馮敬恩喺一六年一月發起圍堵港大校務委員會，事後佢承認刑事損壞同企圖強行進入兩罪，而刑事恐嚇則脫罪、但交替罪嘅在公眾地方作出擾亂秩序行為罪成，被判二百四十小時服務令。