政情：身在獄中提口頭質詢 邵家臻勁刷存在感
立法會社會福利界議員邵家臻喺違法佔領行動案件中被判囚八個月，但早前轉送羈留病房，至前日被押抵赤柱監獄服刑。唔知係咪擔心建制派會提罷免動議，邵家臻議辦繼續營運，常以邵嘅名義向政府發書面問題，甚至最新將會喺本月二十二日嘅大會上提口頭質詢，勁刷存在感！但身在獄中嘅佢，又點樣提口頭質詢呢？
根據立法會最新文件，大會上首條口頭質詢就係由邵家臻提出，問及有關工人權益，包括訂立標準工時、為過勞死立定義等。按正常做法，每次大會都由議員自己讀出六條口頭質詢，相關官員出席會議回應，再開放畀全體議員做補充質詢。
代發問人選未定
佢在囚唔係完全無法處理，按《議事規則》，議員可指定另一位議員代為發問，據了解或由專業議政議員或工黨張超雄幫忙，但未確定，如指定議員屆時無現身，都可由內務委員會主席幫忙提問。邵之前申請喺服刑期間到立會開會被拒，難道提問就為咗可以「出獄」而鋪路？如今都係乖乖哋喺獄中反思喇！