政情：31歲區諾軒收平安鐘促銷電話
唔少市民都收過促銷電話（Cold call），依家係最年輕嘅立法會議員區諾軒尋日自爆，「我今年三十一歲，我收到個Cold call同我講要唔要平安鐘」。佢仲爆埋相關電話號碼，質疑到底有幾多人每日都收到荒謬電話，之後仲哭笑不得咁高呼「我真係唔需要平安鐘，你（促銷電話公司）可唔可以唔好打畀我呀」。其實佢曾被指年少老成，個樣睇落比真實年齡老，唔通因為咁先會咁大反應？
立法會人事編制小組委員會審議保留商務及經濟發展局通訊及創意產業科兩個職位，處理規管人對人促銷電話。區先係提到點樣擊退Cold call，包括裝手機程式，甚至喺收到借錢電話時，同對方講「我想借一億」，對方好多時都會「Dead air」咗五秒先有反應。
收到平安鐘Cold call嘅仲有批發及零售界議員邵家輝，但佢嘅反應就冷靜得多，話之前有人問過佢點樣申請平安鐘，所以上次收到電話之後，索性抄低個電話號碼，然後再轉交畀有需要嘅人。
象哥形容似「午夜凶鈴」
進出口界議員黃定光（象哥）形容Cold call係「午夜凶鈴」。佢解釋，美國、加拿大等地有時差，Cold call打嚟正正係熟睡緊嘅時候，但佢個電話唔會熄，啲Cold call一打嚟就響，即刻嘈醒晒。
與會嘅官員話依家正就規管人對人促銷電話方面草擬法例，預計年底公布。