政情：陳茂波辦事不力盈餘估少近百億

財政司司長陳茂波（波叔）又估錯數，盈餘估少近一百億元。政府尋日更新二○一八至一九年度財務狀況，顯示綜合盈餘較二月底預算案嘅修訂預算嘅五百八十七億元，增加九十三億元至六百八十億元。講真嗰句，依家多咗近百億元，係咪應該臨時派多些少糖先？

今年預算案盈餘減少，當時修訂預算嘅盈餘係五百八十七億元，因此派糖措施都大幅縮水，例如綜援及各項公共福利金等由派「三糧」改為「雙糧」，更加唔會有任何派錢措施，真係令唔少基層大為失望，又要諗吓點樣慳住使。

點知原來波叔又再估錯數，政府尋日更新二○一八至一九年度財務狀況，盈餘增加九十三億元，即係達到六百八十億元，如果相比原來預算，估錯數嘅情況就更誇張，原來預算係三百四十九億元，同依家最新嘅臨時數字相差三百三十一億元，即係近乎多咗成倍。計嚟計去都係錯，真係唔知搞邊科？

政府解釋，其中收入比預測增加三十四億元，主要由於地價增加約十億元，同埋入息及利得稅嘅收入增加約十億元，兩者都較預期高，而開支就較修訂預算減少五十九億元，主要由於開支需要較預期少。政府又話，截至今年三月底，財政儲備為一萬一千七百零九億元。

政府發言人話所有數字都係臨時數字，有待年度帳目的最後結算作實。不過，根據經驗，即使臨時數字有變動，幅度亦唔會好大。

翻查紀錄，波叔都唔係第一年估錯數，佢就二○一七至一八年度，原預算係一百六十四億元，結果最終有成一千四百八十九億元盈餘，多出八倍，估錯數估到破晒紀錄。點知波叔仲未學乖，今年盈餘數字又再出錯，到底波叔係咪慣咗低開高收，咁就唔使派咁多糖，一下子派晒所有錢呢？真係得佢至知嘞！

真相係點都好，政府坐擁逾萬億元儲備，既然今年派少咁多糖，依家多咗盈餘，波叔又好，其他政策局都好，都唔好扮見唔到啦，不如諗吓點樣即刻派多啲糖，幫吓基層紓困啦！