中環出更：蔡關穎琴佛山考察住員工宿舍媲美酒店
逢親有短途嘅商務考察或親子活動，好多人首選係去廣東。香港中華總商會婦女委員會早前就拉隊去廣州同佛山考察，由婦委會主席蔡關穎琴（Janice）帶隊。期間去咗佛山參觀有「紡織女王」稱號嘅行政會議前成員楊敏德間廠，獲對方招呼住員工宿舍。Janice笑笑口話，原本以為宿舍嘅設施好基本喇，點知又大又舒適，媲美大酒店添！
今次團員仲有婦委會副主席莊吳時、極地探險家李樂詩同博愛醫院永遠顧問王敏馨等人。Janice話參觀楊敏德間廠之後，仲去咗港人喺佛山投資嘅電影城，喺影城入邊食飯時，侍應着晒清宮服飾上菜，場面好好玩，大家都爭相合影留念。
中總青委成員鄭優美同梁穎雯（Connie）都有隨團。鄭優美喺一間女子學堂博物館參觀時，見到古箏即急不及待坐低彈兩下，佢笑稱自細就好喜歡琴棋書畫，見到古箏自然好開心。Connie就對楊敏德間廠留下深刻印象，事關佢哋好重視環保，就算成本好高，都肯投資將工業污水淨化成飲用水，真係好抵讚。
潘桂桃帶囡囡體驗鄉村生活
香港金銀首飾工商總會副會長潘桂桃（Passy）早前都帶埋混血囡囡貝詩慧去廣東河源體驗鄉村生活，Passy老公係澳洲人，囡囡平時喺香港讀國際學校，對中國文化同大自然生活都比較陌生，要靠媽媽刻意安排先得。Passy笑笑口話個女去河源期間同玩伴一齊捉蝌蚪，又見到好多青蛙，等於上咗一堂大自然嘅課，囡囡不知幾開心。
卓妮