中環出更：無證BB立會出沒 容海恩：你會唔會搞事啊？
立法會發現「無證兒童」！所有人出入立法會均需要登記，就算議員、職員同傳媒都要有證拍卡出入，以確保大樓內安全。尋日有議員竟公然抱住一個小朋友進入立法會大樓，仲要無登記，保安又無阻止，更吸引咗一班議員上前起哄，到底係邊個有咁大魅力？
民主派議員都撩BB玩
話說尋日朝早立法會一個法案委員會開會臨近尾聲時，要暫停會議十五分鐘，首位任內結婚、生仔嘅議員容海恩（Eunice）就抱住三個月大嘅囡囡落會議室，引來全場哄動，連民主派議員都放下成見上前撩BB玩。建制派議員葉劉淑儀、葛珮帆、麥美娟、梁美芬同何俊賢等人通通上前圍觀，BB似係見慣大場面好乖無喊，更懶懶閒咁打喊露。
問到BB有無訪客證？Eunice承認無，話自己抱住佢入嚟，更即刻打趣望住BB問：「你無證喎，你會唔會搞事啊？」當時BB神情呆滯，似係未明媽媽問緊乜嘢？最後復會時Eunice就抱BB返上辦公室喇！
卓妮