政情：今日你上鏡：等人等到餓 霍震霆當街吔蕉

香港體育協會暨奧林匹克委員會會長霍震霆有孫萬事足，但都有孤獨嘅時候。早前我哋見到霍震霆一支公現身中環太子大廈，喺書店入面逗留咗十分鐘，期間望完一本又一本，仲睇到入晒神，將太陽眼鏡放上額頭。轉過頭見佢走咗入超級市場，行咗短短幾分鐘就睇中咗一隻蕉，畀完錢就邊行邊食，好似好肚餓咁。不過佢警覺性都好高，一見到有人影相就放底咗條蕉喇。佢話剛落機回港就去到中環等朋友，連飯都未食，加上突然想食蕉，貪佢有益又飽肚，食一隻已經夠飽喎。