政情：黃偉綸廖振新冇影 發展局淪真空

陳帆頂硬上兼任

根據政府刊憲，黃偉綸尋日起開始放假，至下周五（26日）復工，放足七日。而廖振新原本應喺黃放假時署任發展局局長，但廖就只係署任該局局長至下周二（23日），下周三（24日）就停任，但佢係放假、離港公幹定另有其他事務就唔知喇。不過發展局出現咗兩日「真空期」，就要運輸及房屋局局長陳帆頂上，陳呢兩日出任運房局局長同時，亦都要兼任發展局局長職務。

查實「明日大嶼」計劃啱啱先開完公聽會，理應有好多事項需要跟進，丁屋政策遭司法覆核挑戰，政府係咪上訴都未決定，兩者都係發展局工作範疇，而且極具爭議，黃偉綸同廖振新呢個時候一齊唔見人，佢哋兩個係咪真係能夠安心呢？