中環出更:半薪做全職梁廣灝第三次想退休

通常有料之人退休後都會不斷被人邀請「出山」,再就業或擔任公職。好似香港專業及資深行政人員協會(專資會)日前舉行午餐聚會介紹新一屆理事會成員,本身係九廣鐵路公司總裁嘅專資會副會長梁廣灝,被問起即將離任九鐵,佢就話自己第三次嘗試退休,屢敗屢試,又話喺九鐵要收半薪,但做嘢責任就全職,聽落真係辛苦。

梁廣灝話,繼五十幾歲嘗試退休,但失敗,六十幾歲嘗試退休,又失敗,依家七十幾歲,再嘗試退休。問佢今次係咪真退休,佢就話「唔係我揀o架呢啲嘢,人在江湖」,不過做得嘢做吓都好嘅。

李鏡波話後生仔難免要捱

講起香港工時長,會長李鏡波就話,佢不時都係朝早十點做到夜晚十二點。依家後生仔成日話工時長,佢話打工希望工時短,但如果做到高層,就難免工時愈嚟愈長以換經驗同提升嘅機會,後生仔難免要捱,「人生哪得幾回博」,做老闆工時都長,因為要養好多人。大律師范凱傑就講起自己工時都相當長,好少全日都毋須工作,因為有時怕推咗一次唔接單案,下次人哋就唔搵你喇。

本身係牙醫嘅副會長梁世民就講起後生時,好多人放工先去睇牙醫,好多時要做到十點幾十一點,依家開始逼病人七點幾到達。佢又話自己開診所可以控制工時,所以又未至於好辛苦,但始終要醫人,如果心情唔好,嗰日就早啲放工。

創會會長容永祺話,佢八十年代剛剛入行做保險時,夜晚兩三點都會打畀客人,因為大型印刷廠夜晚開夜班,但第二日都係要九點鐘返工,但依家就好着重平衡,星期一至五夜晚收工後有機會同家人去睇戲,星期六、日就盡量留番時間畀屋企同教會,佢唔贊成後生仔工時過長,做人應該作息有時。

卓妮

第一手消息請下載on.cc東網iPhone/iPad/Android/Windows Phone Apps