政情：黎穎瑜自細重口味 唔臭唔食
榴槤、臭豆腐呢啲重口味嘅食物並唔係人人都接受到，但對於鍾意食嘅人嚟講就會話愈食愈好味。好似民政事務局局長政治助理黎穎瑜早前就自爆細細個開始就已經鍾意食榴槤，仲話其實起初覺得好臭，不過只要頂到嗰陣榴槤味，願意放入口，之後就會變得鍾意食喇！
至愛榴槤臭豆腐
黎穎瑜仲話爸爸都唔鍾意食榴槤，所以細個要食榴槤就要等佢爸爸出咗街，先至可以同媽咪一齊開餐，食完仲要快啲「毀屍滅迹」先得。至於臭豆腐都係佢至愛，而且比較多親朋戚友鍾意食，有時會一齊去旺角掃街添！
好多小朋友都鍾意飲汽水，佢話自己細細個時都係咁，但依家就好少飲。反而愛上飲中國茶，當中特別鍾意普洱，可惜工作繁忙，冇乜時間鑽研點樣泡茶。不過佢最近發現近年開始多咗冷飲嘅中國茶，茶香都相當濃郁，感覺都幾新鮮咁話。